Ka Jing-shong-kurim baphylla

Ka Jayrambati ka long ka shnong ka barit haka district Bankura haka jylla Bengal ba sha sepngi. Haka khad khyndai-spah snem, la don ha kata ka shnong kawei ka ïing Brahmon kaba don lai ngut shipara, ki shynrang suda, kiba im da kaba rep kba. Na ine i jingïoh i ba rit la pynlut ruh ha kaba lehniam kat kumba dei ïa ki lyngdoh ban leh. Ki hun kat kaba ki ïoh bad ki ïa suk kat kum ka rukom im ki Bramon. U kpa ka ïing u dei u Ramchandra Mukherji, u briew uba duk hynrei u ba hok bad la bna nam ïa u namar ki kam isynei bad leh sbun. Ka Shyamasundari Devi ka la long ka lok jong u; ka long ka briew kaba shida, kaba trei shitom, kaba jemnud bad kaba riewblei.
Haka 22 tarik u Nohprah 1853, haka por tlang, la kha ïa ka khun phrangsngi jong ki. Ki kmie ki kpa jong ka ki la jer kyrteng ïa ka Ka Sarada ka blei jong ka jingstad. Hadien ha bud khlem poi pyrkhat kata ka kyrteng ka la ïa hap bad ka jinglong jong ka. Ka la ïoh ïa ka jingstad ba kynja mynsiem kaba kham pher na kiwei pat bad lah ban ïoh tang ïakito kiba la aiti ïalade ha u Blei.
Ka Sarada ka long ka khynnah kaba tipsngi bad kam don por wat ban ïalehkai bad la ki para khynnah ruh. Naduh ba ka dang khynnah ka bun kam shi katdei eh namar ka ju ïarap kam ïa ka kmie ha kaba shet ° jingshet bad peit ïa la ki para rit. Bunsien ruh ka ju hap leit rah jingbam ïa ki nongtrei ha ki lyngkha. Ym ju don dustur ha ki por mynshuwa ban leit skul ki kynthei wat la hadien da ka jingtrei shitom jong ka hi ka la nang ban pule hynrei ym ban thoh.
Ka jingjia kaba la pynsah jingkynmaw eh haka jinglong khynnah jong ka ka long ka jingshong kurim jong ka ïa u Gadadhar Chattopadhyaya (u ba la tip hadien kum u Shri Ramakrishna) u ba la long kum u lyngdoh naduh ka snem 1855 haka ïingmane jong Ka Kali ha Dakshineswar, kaba don haka rud duriaw ba shaphang mihngi jong ka wah Ganga kaba don shaphang shatei jong ka Calcutta. Ka jingshakri blei ha kata ka ïingmane ka la pynkwah hir hir ïa u Sri Ramakrishna ban ïa long lang kawei bad ka kmie ba riewblei, bad kane ka la sdang ban pynlamwir ïa u bad ïa kane ka jinglong la ïohi da kiba ha ïing ha sem jong u. Kumta la ïa lam noh ïa u sha Kamarpukur bad ka kmie jong u ka la pyrkhat ba lada un shong kurim u lah ban klet noh ïa kita kiei kiei kiba kynja mynsiem bad kumta ka la sdang ban ïaleh shitom namar kane. Ki jingleh shitom baroh kim sei soh, haduh ba khatduh u hi u la ong ïa ki ban ïit ka briew jong u na ka ïing u Ramchandra Mukherji. Nangta ka la sngew kyndit haba ka
shem ba don tang i khynnah iba dang san snem ka rta. Hynrei baroh arliang ki la ïasuk, bad kumta ka jingshongkurim la pynlong ha Jayrambati ha u bnai Jymmang jong ka snem 1859. U Shri Ramakrishna ha kata ka por u ladap arphewlai snem ka rta.
Ka Sarada ka dang shong hi bad la ki kmie ki kpa haduh hadien khadlai snem. Katne snem ka la shong hynrei ka la ïa kynduh tang ar-sien bad u lok jong ka. Shisien ha u ’nai Nohphrah jong ka snem 1860 haba ka dang dap hynñiew snem ka rta u la wan sha ka ïing u kthaw jong u ban wan jngoh ïa ka. Ka Sarada ka la ktah ïa ki kjat jong u bad nangta ka la sdang ban kaweh pakha ïa u. Kane ka jingkhot sngewbha ka la kyrsoi na ka jingieid bad namar ba ka la long tang ka khynnah ka la nang kham sngewkmen shuh shuh.
Hadien haba ka la dap khadsaw snem ka rta ka la sah bad u Sri Ramakrishna kumba hynñiew bnai ha ïing jong u ha Kamarpukur. U long u ba shah shkor bha ïa ka bad kane ka la pynlah ïa u ban batai ïa ka shaphang kiei kiei kiba kynja blei bad shaphang ka pyrthei. Kine shijur ki ïa ieid bha iwei ïa iwei pat. Ym don ktien ban batai ïa ka jingsngewsuk ba ka sngew haba u don hajan bad bunsien ka ju ïathuh ha ki nongbud kynthei jong ka kumne ‘‘Nga sngew kumba u khiew u la dap tang da ka jingkmen ha kaba la tynsat hapoh ka dohnud jong nga”. Da shisha ka long ka jingshongkurim kaba phylla haka pyrthei, namar naduh nyngkong ka long kaba dap tang da ka jingsuk bad jingkmen mynsiem.

yn dang bteng…)