Myllung ba stad ba iohi jngai,
Jylliew pyrkhat naei ban shai,
Aiom tyllun ki sngi u bnai,
Na ka mynnor u lum jingshai.
Myllung u iaid kylleng ka ri,
Da la ki khmat u kwah iohi,
Mariang buhrieh kan sei ia ki,
Naduh kynthong mynta iohi.
Shwa ba phin rung sha Soso Tham,
Myllung u shna ka dur sahnam,
Jingkieng jyrmi iathain dani,
Dur ba phylla bym juh iohi.
Ka wah napoh jingkieng ka tuid,
Tlang bad Lyiur ki sur kynud,
Pynthor ki nur kine jyrngam,
Ki shalynnai ki jngi ki ngam.
Ha ki diengbah tiew dieng ki pur,
Ki shat syrngiew ha um ba sngur,
Ki mrad kine ki wan dih um,
Ki shong jahthaid ha maw bajngum.
Ki khun bynriew shong dih duma,
Ki shong jahthaid harud jong ka,
Kynthei kit soh na thiep ki kiew,
O khlem khuslai ki hiar ki kiew.
Ko ma kylli shong dih duma?
la ki pyrta khynnah samla,
Halor ki maw khlem khuslai,
Hapneh mariang kine kynjai.
Myllung u peit shano kan ingi
Kam kwah ban ioh jingkieng jyrmi
Ka kup ki rong da i jemnud,
Ban khlad na ka jingkieng bynnud 