Prof Streamlet Dkhar
Kum ka phyrngab jong ka step Nga ap ïa ki kjat sngi jong ka jingkyrmen Ba kin pynjah thait ïa dohnud ba jrem, Ha ka jingïaid ïa ki mawjam jong ka jingim Ki khohruh khohram ki la pynsniewdur Ïa jingbhabriew ki khongdong jat ba lyngkhuit; Kum u mawshamok ba meh ding Ka dohnud ka kyan da jingbitar, Haba la khoh snieh ïa ki syrtap ka dohnud Da kito kiba phi keiñ kordor tam; Shano kito ki rympei ba shongblei? Shano ki khun tipduk i Mei? Ko mangkarong ba shet shukor! Balei pha phnieng shangkhawiah Ïa ki khun samla ha bunjait ki ahor? Ka jingïaishah ka don la ka dor Ki jingduwai ki don la ka jubab Tangba ngam tip haduh lano kan jia? Nga pang ka mynsiem ban ïohi ïa jingjot Ïa khun samla ka Ri Kumno pat yn maramot? Khyndiat eh ki wanphai Kum khun sarong awria Rynjaiñ la ki pop ki wan ban phla Ba ki la ïoh pat ban lait im na jingthala! Dang bun byllai kitei ha lum Kum ‘langbrot b’la sakma; A! shano bad mano ban wad ïa ki? Ka por ka tyllun stet kum ki dew Ba jah lyngaid noh hapdeng duriaw, Ha jingduwai ba jar-jar la dohnud ba pharia Nga aiti ha ki kti ba donbor tam; Ba da jingleh phylla na sha lyndet Da jingsngewrit la dohnud nga wan ban bret; Ki lumbah kin khih bad ki mawsiang kin phret Ko kjat Sngi ka jingkyrmen! To shat ha ki khun ka Ri Ba sa shisien ka im tipbriew Kan wan phai pat ha ki