La pynkylla khasi da I Bah P S Lyngdoh
Sa shisien pat to kyrsiew!
Naba ka la iohthiah, ym ka jingiap, ban pyn-im pat iapha
Pyn-thymmai, bad shongthait ha ki khmat-u tiew lotus ban ioh jingiohi-paw
Da kaba shlur te. Ka pyrthei da shisha ka ap, Ko ka Hok!
Ym don jingiap ia pha!
Sdang pat ia ka jingtur shaphrang jongpha,
Da ki kjat ba jem bymlah kdiah
Kaba shongthait ka pynsuk wat ha u pum pum ka rud surok
Kaba dem hapoh eh. Pynban kaba khlaiñ bad kaba iaineh, Ba dap jingkyrkhu, ba khlaiñ, bad ba laitluid. U nong-kyrsiew thiah
Iai tur sha khmat ! Kren da ki kyntien ba ai mynsiem jongpha.
Ka ïing-shong jongpha ka la jah noh,
Hangno ba ka dohnud baieid ka lah pynheh-pynsan iapha bad
Ba la ap da ka jingkmen ia ka jingsan jongpha. Hynrei ka Kupar kaba khlaiñ— Kane ka dei ka aiñ—baroh kiei kiei ki wanphai kylla sha la tynrai
Ki lah kynthih, ban pyn-thymmai ia ka bor jong ki.
Te sdang thymmai pat
Na ka ri ba pha la kha, ha kaba shibun u lyoh-ba la panpoh
Ka ior ka kyrkhu bad buh ia ka jingkhlaiñ jong ki ha pha,
Naba kaba trei thymmai phylla.
Ka Wah ba kynja bneng ka pynmih ia ka sur jongpha ha la ka jong ka jingrwai bym ju iap;
Ka syrngiew u dieng Deodar ka ai iapha ka jingsuk pateng-la-pateng.
Bad nalor kitei baroh
Ka khun u Makashang, ka Uma, ba jemnud, bakhuid,
Ka Kmie kaba don ha baroh kum ka Bor
Bad ka Jingim, kaba trei baroh ki jingtrei bad
Kaba pynlong ia ka pyrthei baroh Kawei, ba da ka jing-isnei
Ka plied ia ka jingkhang sha ka Jingshisha bad ka pyn-i
Tang Kawei ia Baroh, kaba ai iapha
Ka jingkhlaiñ bym ju thait, kaba long ka Jingieid Bymlah-thew.
Ki kyrkhu iapha baroh,
Ki nong-iathuh-lypa bakhraw, kiba ka pateng lymne ka ri
Ki lah ban kam trai kum la ka jong, ki kpa jong
Ka Jait-bynriew, kiba la iohsngew ia ka mynsiem jong kajuh ka Hok,
Bad ba la hikai da bashlur ia u briew da ka sur-basniew ne
Babha. Ki shakri jong ki, ba pha lah ioh
Ia kaba rieh—ba dei ban long hynrei tang Kawei.
To kren, Ko JIngieid!
Ha khmat ka sur bakynjah jemnud jongpha, ha khmih kumno
Ki jing-pynpaw ki um bad ki syrtap ba iai syrtap ha jing-phohsniew
Ki khlad noh ban pyn-thylli, tad haduh ba ka Hok bad tang ka Hok marwei
Ka tyngshaiñ ha ka burom jong ka baroh—
Bad iathuh ha ka pyrthei—
Khie noh, kyndit joit, bad wat phohsniew shuh!
Kane ka dei ka ri jong ki jing-phohsniew, ha kaba u Karma
U thaiñ u la loit noh ia ki jingdeng lem bad ki jing-pyrkhat jongngi
Ia ki syntiew ba iwbih ne ba pyn-sniew, bad bym don
U tynrai ne u metbah, ba la pyn-kha ha bymdon ei ei, kaba
Ka jing-pynhiar-mynsiem ba jem tam jong ka Hok ka beh noh sha
Ka Tynrai bym don ei ei. To long ba khlaiñ, bad to tur pyrshah sha
Ka Hok ! To long kawei bad ka! Ai ki jing-iohi-paw kin duh noh,
Ne, lada phim lah, to phohsniew hynrei ia ki jing-phohsniew ba kham shisha,
Kiba long ka Jingieid Pateng-la-pateng bad ka Jingshakri Laitluid