Ka Jingkren haka jingïalang bakhatduh
27 tarik Nailur, 1893
Ka Dorbar bah ki Niam ka la long ka jingshisha, bad U Kpa ba i-synei U la ïarap ïa kito kiba trei shitom ban pynlong ïa ka bad u la pynphong pansngiat da ka jingjop ïa ka jingtrei shitom ba khlem tyngkai jong ki.
Nga ai khublei ïa kito ki ‘Riewkhraw kiba na ka mynsiem bakhraw bad jingibit ïa ka jingshisha ki la phohsniew ïa kane ka jingphohsniew baphylla bad la pynlong ïa ka, ka jingshisha. Nga ai khublei ïa kito kiba la theh ki jingsngew bakylluid mynsiem kiba la shlei miar halor kane ka rynsan. Nga ai khublei ïa kito ki nongsngap bashemphang na ka bynta ka jingsbun ryntih jong ki ïa nga bad na ka bynta ka jingïahap jingmut ïa ki jingpyrkhat kiba la pyrshang ban pynjlih ïa ka jingkyrshut jong ki niam. Katto katne ruh la ïohsngew ki jingkyrhuh ba pynkyndit bynriew man la ki por na kane ka jingïalang ba ïaid beit. Nga ai khublei kyrpang ïa ki namar da ki jingpyrshang jong ki, ka la nang syrdoh ïa ka jingïatylli lang.
La kren shibun kiei-kiei na ka bynta ka jingïatylli ki niam. Nga hi ngam ong ei-ei ïa ka jingpykhat jong nga shaphang jong ka. Hynrei lada don mano-mano hangne u ba kyrmen ba kane ka jingïatylli kan long da ka jingjop jong kano-kano na kine ki niam bad ka jingduh noh jong kiwei pat, ha uta nga ong, “Ko para ka jingkyrmen jong phi ka long ka bym lah long.” Tharai nga kwah ba u Kristan un long Hindu? Em, U Blei um shah. Tharai nga kwah ba u Hindu ne Buddhist un long Kristan. Em, U Blei um shah.
Ïa u symbai la btep hapoh khyndew, ka sboh, ka lyer bad ka um la ai sawdong jong u. Phi tharai u symbai un kylla sboh, lyer ne ka um? Em, u kylla long u jingthung da ka aiñ ka jingpynlong ïa u. U kjit ïa ka lyer, ka sboh bad ka um bad tylliat ïa ki ban long jingbam bad u kylla long u jingthung.
Ka long kumjuh ruh bad ki niam. U Kristan un nym long u Hindu ne Buddhist ne u Hindu ne u Buddhist, un nym long u Kristan. Hynrei uwei-pa-uwei un shim lang ïa ka mynsiem jong kiwei pat hynrei u don hi la ka jong ka jinglong tynrai lajong bad u san kum la ka jong ka jinglong.
Lada ka Dorbar bah ki niam ka la lah ban leh ei-ei, ka dei kane; ka la pynshai ïa ka pyrthei ba ka jinglong hok, jinglong khuid bad jingleh i-synei kam long ka nongkynti tang jong kano-kano ka niam ha ka pyrthei bad ba kano- kano ka niam ka la pynmih ki ‘Riewkhraw kynthei bad shynrang. Hakhmat kane ka sakhi lada mano-mano ki jingphohsniew ba im tang la ka jong ka niam bad kiwei kin duh noh, nga sngewsynei ïa u ta naduh la ka mynsiem. Ngan kdew ha u ba ha ka lama jong kawei-pa-kawei ka niam yn sa thoh ba wat hapdeng ki jingialeh; “Iarap ym ban ïaleh pyrshah.” “Pynbha ym ban pynjot.” “ Ka jingïatylli bad jingsuk ym ka jingïapait ïapra.”
U Kristan un nym long u Hindu ne Buddhist ne u Hindu ne u Buddhist, un nym long u Kristan. Hynrei uwei-pa-uwei un shim lang ïa ka mynsiem jong kiwei pat hynrei u don hi la ka jong ka jinglong tynrai lajong bad u san kum la ka jong ka jinglong.