Ha kata ka Ri ka Raij ka ba ym don jingpang ym don jingїap, ym don sngewsih ym don jynjar, ym don tymmen ymdon kro; don tang U Blei Nongbuh Nongthaw u Thakur Bamon Uba ker Uba da na ka khlam ka rup bad baroh ki ba sniew ha kane ka pyrthei. U bynriew u khie samla bad noh tymmen, nangta u khie samla biang bad noh tymmen; kumta shi kumta, ym don ka pang ka jhia ka їap ka duh. Kumta u Syiem Nongklung uba synshar ha kata ka hima, u la btai kum kata ka jingim bad u kwah ban mad sa kiwei de ki jinglong jingman ha ka jingim briew. Namarkata, haba u kwah ban mad їa kata ka sngewsih, u la leit sha U Thakur Bamon ban їathuh ba la їap noh ka khun. U Thakur Bamon u la lyngngoh bad u la ong haba u lah їada na baroh ka jingpang ka jingїap ka jingtymmen, ka khlam ka rup; kumno ba dang їap kata ka khun u myrlem. Hynrei u Syiem Nongklung u la pynskhem ba la їap ka khun bad kumta de u Thakur Bamon u la leit ban sakhi hi dalade їa kata ka jingїap kata ka khun u myrlem, u Syiem Nongklung. Ynda u lah poi ha їing u Syiem Nongklung u la kylli hangno kata ka metїap? U Syiem Nongklung u la pyni їa kata ka met ba la pynthiah ha ka krong ba la tap lup da ka jaiñ. Ynda haba u Thakur Bamon u la plied їa ka jaiñ, u lap pynban ba dei da u ksew. Hangta U Thakur Bamon Uba long U Nongthaw Nongbuh jong u bynriew u la bitar lep bad u la kynjat noh їa ka kor kaba u la ker ban їada їa u bynriew na ka pang ka shitom, na ka iap ka duh bad na baroh ki jingshitom jingjynjar jong kane ka pyrthei. Naduh kata ka khep u bynriew ha pyrthei u sa mad їa baroh ka pang ka jhia, ka їap ka mynsaw, ka sngewsih ka jynjar bad baroh ki jingsniew ki lanot ba suhsat ba syrtok jong kane ka pyrthei. Hynrei u Syiem Nongklung um shym la їoh ban thang їa uta u ksew bad uta u ksew u la kylla maw bad u dang don haduh mynta mynne ha nongbah jong ka Raij Nongkhrah.Haba la jia ka jingїap ha u khun bynriew kumta la sdang ban mih sa ka diaw ka pangnud ba tmang na ka bynta ki ba їap bad ha kum kata ka khep don ki kaitor ki duhalia ki ba kynud sur sngewsih kumba sngewlem ïa ka longïing longsem bad dukha ba la duh ei ka jingimbriew. Ha ka sngewbha ka sngewmiat ha ka rong ka taw la don lypa ki sur jingrwai jingtem ki ba dei na ka bynta kata ka rukom, hynrei ym pat ju don na ka bynta ka ba їap. Kumta naduh kata ka por la shna thymmai ki sur bad tiar put tiar tem na ka bynta ka sngewsih їa ki ba їap. Hangta ki beh mrad їa ka shrieh, ki khoh snieh; ki khud їa ka dieng bad ki thaw da ka maryngod bad naduh kata ka por la thaw ka sur sngewsih na ka maryngod bad la pyndonkam beit tang ha ka ba sngewsih ha ka ba їap briew; їa kata ka sur їam briew ki khot ka ‘jamlu’. Ka maryngod ka dei thik tang na ka bynta ka sur їam briew, bad haba їam ba sngewsih ruh baroh bad kynthei bad shynrang ki їam briew. Kumta ka maryngod ruh ka don kawei ka kynthei bad kawei pat dei u shynrang; kata ka maryngod kynthei bad maryngod shynrang. Ka maryngod shynrang ka mih ki tympha ki reng kiba їeng sha neng haba buh їa ka maryngod, bad ki tympha jong ka maryngod kynthei ki dem sha rum.
Hadien habud, haba baroh baroh la pyndonkam kata ka jamlu ha ka їambriew; ym tang u bynriew uba kwah ban tem ka sur їam briew, wat ki ksuid ki khrei ruh ki kwah bynta lang ha kata ka blaw ka diaw kum u bynriew. Ha kawei ka sien uwei u nongrep u la rah ka maryngod sha lum haba u leit ap kba bad u la thiahkai ha rynsan diengjri ban tem kai hangta da kata ka maryngod. Kyndit kynsan la wan mih ka thabbalong na kata ka diengjri namar ba ka їohsngew їa kata ka jingtem sur ba myllung. Hangta ka la kop ka la aireng їa uta u bynriew ka da ong ba un tem na jrong rynsan bad kan shad ha tbian. Kata ka jingїakop ka long ba kat ba thait shwa kin shah jop ha kata ka thong. Ka la ong ba lada un rem te kan sa bam doh noh їa u. Kumta uta u nongrep u la tem bad ka thabbalong ka la shad bad katba ka shad ka shad u nongrep katta u dang shitrhem ban tem. Hadien shislem bha ka thabbalong ka la thait їar, hynrei u nongrep u dang їai tem kata ka maryngod haduh ba ka thabbalong kan da kyllon lyngktar hangta ha madan. Mar kumta u nongrep u la hiar na rynsan bad u la sei la ka wait tasam ban dung jrak na shadem hynrei kata ka thabbalong kam їap. U la dung sa dung kylleng ka met jong ka namar ba ka la thait palat bad kam lah khie khlieh shuh, katta ruh kam man їap. U nongrep u la їaleh tyngeh ban pynїap hynrei haduh ban step phyrngab ruh um lah ban pynjah mynsiem їa ka. Ha kata ka por la wan her ka paitpuraw bad ka la pah sa pah bad u nongrep u la їathuh ba u lah їakhun baroh shimiet shi їa ruh um man lah ban pynduh mynsiem їa ka thabbalong. Ka paitpuraw ka la ong ba lada un kohnguh їa ka te un sa lah ban pynїap їa ka. Kumta ka la pah kum ban bthah їa u nongrep kumno ban pynїap їa ka thabbalong; ka la ong ba un dung da u kdait kasing na shadem bad thoh ka snam jong ka thabbalong na tdong jong ka. U nongrep u la kohnguh kumba lah batai ka paitpuraw ba un khet da u kdait kasing bad lit pynnep; nangta sa dung na shadem bad hangta kan sa їap. Hynrei u da kynmaw ruh ban hap tah da ka snam na uta u kdait kasing ha lyeit jong ka paitpuraw. Uta u nongrep u la kohnguh bad leh thik kumba la bthah kata ka paitpuraw bad ynda lah dep dung haduh ban da phlei snam na klongsnam kata ka thabbalong u la thoh kata ka snam ha tdong jong ka paitpuraw, bad tang kumta hi ka la їap kata ka thabbalong. Naduh kata ka por ka paitpuraw ka la saw sah ka tdong bad ki kynja ksuid kynja khrei kim nud shuh ban wan shad lang bad u bynriew.
