U Swami Vivekananda u la mih na Bombay ban leit sha Amerika. U la ïaid lyngba ka China, bad Canada. U la poi ha Chicago ha u Naitung 1893. Ha Canton u la ïohi katto katne ki riewniam Buddhist. Ha Japan pat u la shem ba ka ri ka la ïaid shaphrang bad nalor nangta ka jinglehkhuid jong ki briew ka la ring jingmut eh ïa u. Ha Chicago pat ka jingriewspah bad jingstad jong ki briew ka la pynshoh bieit ïa u. Hangta pat u la shem ba kata ka Dorbar bah jong ki nïam kan long haduh u Nailar. U la sngewdiaw ruh ban shem ba ym don ba lah ban long u dkhot jong ka khlem ki jingthoh jingtar ban pynithuh ïa u. Hynrei khlem da duh jingkyrmen u la shaniah ha ka jingpynïaid U Trai Nongthaw. U la leit sha Boston. Ha ka rel ha lynti u la iakynduh bad ka Miss Katherine Sanborn, kaba la khot sngewbha ïa u ban sah ha ing jong ka. Lyngba jong ka, u la ithuh ïa uwei u nonghikai badonnam jong ka skul bah Harvard, u Prof. John Henry Wright. Une u nonghikai u la ai ka shithi pynithuh sha u President jong ka Dorbar bah ki niam. Ha kane ka shithi, une u nonghikai u la thoh kumne, ” une u dei u briew uba kham shemphang ban ïa baroh ki nonghikai jong ngi.”
U Swami u la leit phai biang sha Chicago, ar sngi shuwa ban long kata ka jingialang bah. Hangta pat u la shemba u la klet noh ïa ka jaka ha kaba don ka ïing bam na ka bynta kito ki nongmihkhmat na ki ri Mihngi. U la sah shi miet ha phyllaw jong ka steshon rel. Mynstep u la mih ban leit wad nongïarap Hynrei u la shem ka long kaba eh ban ioh jingïarap khamtam ba u dei u dohïong. U la sngewthait ha kane ka jingleit wad jong u, u la shong harud surok bad shu shaniah ha ka jingpynïaid u Kynrad. Hadien katto katne por, la wan mih kawei ka briew ba donburom na ka ïing paki dulan ba ha shi liang surok. Kane ka dei ka Mrs. George W. Hale, ka ba hadien ryngkat bad kiba ha ïing ha sem jong ka ki la kylla long ki nongbud jong u Swamiji. Ka ïing jong ka, ka la kylla long ka jaka shong jaka sah u Swamiji katba u dang don ha U.S.A.
Ka Dorbar Bah Ki Nïam ka la plie ha ka 11 tarik U Nailar 1893. Ka kamra bah jong ka Art Institute ka la khapngiah da ki briew kumba 7000 ngut. Ha ka rynsan ba la buh, don ki nongmih khmat jong ki jaid nïam bapher bapher ha pyrthei. U Swamiji, mynno mynno ruh um pat ju kren ha khmat u paitbah babun bad badonburom kum uta. Ha ka ba nyngkong u la sngewkyiuh. Ynda la dei ka pali jong u ban kren, u la duwai ha la ka mynsiem ïa ka Blei Sarasvati, kaba long ka Blei jong ka jingnang jingstad. U la sdang ïa ka jingkren jong u da kine ki ktien; “Ko phi ki Hynmen-Para ka Ri Amerika.” Mar kumta la bud ka jingthap kti jong ki nongsngap, ka bym pat ju don mynno mynno ruh, kaba la neh kumba ar minit. Da ki hajar ki briew ki la ieng na ba shong ban pyndon burom ïa u. Kita ki briew ki long kiba ju iohsngew ïa ki jingkren tap eitmiaw jong ki nongkren bastad kim shym la khmih lynti ha kata ka kynti ban iohsngew ïa ki jingkren ba shida une u riewnïam na India. Ki ktien bashida bad ba sngur jong u, ka main briew jong u bad ka rïam rongsoh jong u, ka la ktah katta katta ïa ki nong-Amerika, kat haduh ba ki kot khubor ha ka step kaba bud ki la thoh ba u dei u Briew uba khraw tam ha kata ka Dorbar bah ki Nïam. Uwei pa uwei na ki nongmihkhmat ha kata ka Dorbar bah, ki la kren iaroh tang shaphang la ka jong ka nïam; hynrei u Swamiji u la kren shaphang U Blei, uba long ka tynrai ha kaba baroh ki jaid nïam kin ïa kynduh lang. U la kren shaphang ka nïam kaba ïar kat ka Sahit bneng bad jylliew kat ka duriaw. U Swamiji u la kren bunsien ha ka Dorbar bah. Man ka sien ba u kren ki briew ki la shah- shkor bha ïa ki ktien jong u. U la kylla long u briew uba ki iathuh khana man kawei pa kawei ka tyngkong ïing ha Amerika. Kumta u la kylla long uwei na ki riew khraw ka pyrthei. Ki ktien iathuh lypa u Ramakrishna ki la ur long hi thik
yn dang bteng