Ka jingkieng ksiar, ka ba pyniasoh naduh ka syrtap ba ha jrong tam jong ha bneng balyngit, ki mawsiangblei, la khot ka Sorkhep, haduh ka kliar jong u Sohpetbneng, ïa u ba ka kynjang ka long 1434 metar, u ba ieng kynjreng, hapdeng jong ka pdeng ka pyrthei baroh kawei, kata 25.42 pynkiang ka
jingthew bad 91.55, pynieng ka jingthew, ha kane ka Ri Hynñiewtrep Hynñiewskum, ka Ri u Hynñiaw Wasung, u Hynñiaw Wasa. Dei u Hynñiew u ba la hiar ban long u nongshynshar jong kiwei kiwei pat ki jingthaw u kynrad, halor ki khlaw ki btap, ki mrad ki mreng, ki jingthung jingtep, kum ki phlang ki rnem, ki syntiew ki skud, ki um ki wah, jong ka Mei Mariang ka Mei Ramew. Kane ka long katkum ka rai jong ka Dorbar Blei ka ba nyngkong, ba la pyniaid da u Blei u Nongbuh U Nongthaw, ka Blei Nong-Hukum.
Ka jingkieng ksiar, ka long namar kata ka daw ka sakhi, ïa ka jinghiar u Hynñiewtrep, hapoh ka jingialam jong u Syiem Lakriah. Hapoh ka pyrthei pyllun, u Hynñiew u la saiñ dur ïa ka long kur ka long kha, ka synshar khadar, jong ki dong ki hula, ki shnong ki thaw, ki raid, ki muluk bad ki hima ki sima, ba u syiem u Kmie, un pyniaid, na ka bynta ka jingbit jingbiang jong ki khun ki hajar, kum ka kmie ïa la ki khun la jong khlem da don kano ka kheiñ peit shilliang ïa u bariewspah, ne ïa u paid knup paid trap, u sem shilliang, u kup shilliang.
La seng ïa kane ka tynrai, ka tyllong, bad ka thymmei u khun Hynñiewtrep u Hynñiewskum, ha ka shlem jong ki lai tylli ki Mawbyrsiew, kata U Lum Sohpetbneng, U Lum Shyllong bad U Lum Diengïei, ki lum ki ba long ki rishot lane ki chrot, ki paia, ki rijied jong ka jingngeit tynrai, ha kaba la mih ki shnat jong kijingleh ïa ki longniam longrukom, ki riti ki dustur, bad ka Lariti jong u paid Hynñiewtrep, kata u Khynriam, U Pnar, U Bhoi, U War, u paid khasi ba-ïar. U Lyngngam, U Nongtrai, U Muliang, U Maram u paid khasi donnam, u ba baroh ki ïeng ha kajuh bad kawei ka tynrai jong ka Tipbriew Tipblei, Tipkur Tipkha, Tiphok Tipsot bad ka Tip-hukum.
Ïa kane ka tynrai bah, ïa ka ba la suh ïa la ki phniang, ki thied, kshaduh ki syrtap jong ka Mei Mariang ka Mei Ramew, la sakhi da ka “Jingkieng Ksiar”, wat la ka dkut noh, hynrei ka dei mynta ka “Mynsiem Ksiar” jong ka longbriew ka manbriew, ïa ka ba u Khun Hynñiewtrep Hynñiewskum, u pynïasnoh ïa lade, lyngba ka jingngeit jong ka Jingkiew, ïa ka ba u Hynñniewtrep u kiew sha la u Kynrad U Blei ka Mei Hukum, lyngba ka Nguh ka Dem, ka Duwai ka Phirat, ka Kyrpad ka Kyrpon, ka Ïasaid ka Ïapan, bad bahiar pat na ka Mynsiem Jingkieng Ksiar, ka Kyrkhu ka Kyrdoh, na ki Blei-Long-Blei u ba Buh u ba Thaw, u ba Lah u ba Ïai, Ka Blei Mei Nong-Hukum.
Ïa kane ka tynrai bah tynrai san jong kaei ka ba ka Jingkieng Ksiar ka Sakhi, da ki ba stad ki ba tip jongki stad ki nang, ha Law Nongthroh. Ha syntai jong u Lum Sohpetbneng ïa ki ba u Khun Hynñiewtrep, u seng ïa ka thymmei ka shong ka sah, bad ruh ïa ki tiar ba pyndonkam naduh ïingshet ja, haduh ki tiar rep tiarriang, ïa ki ba la oh bad stah na ki maw, (Archaeological findings and evidence). Ha kane ka shnong tynrai jong u khun Hynñiewtrep la lap bad shemruh ha ki mawbynna, ki ba ïathuh bad ïai sakhi ruh ïa ka juk jong ka jingkieng ksiar, kata ka ba ki mawbynna ki ïeng ban khana ban purom shaphang ki longshuwa ki manshuwa, na kawei ka pateng sha kawei pat, haduh kine ki sngi ki por ki ba mynta. Kine keiñ ki Maw nam, Ki Maw Shynrang, ki Maw Kynthei, ïa ka ba la bsap ha kine ki maw, ïa kaei kaba ka Jingkieng Ksiar ka sakhi, ha ba shit ha ba shai.
Ha kane ka Law Nongtroh, ki dang don ruh ki Hynñiew tylli ki Kpep, ki ba kdew ïa ka jingpyndep rukom, ha ka ba thang ïa kito ki longshuwa manshuwa. La lap bad shem ruh ïa ki mawshyieng jong ki kur ki jaid ki ba pher ba pher. Ha ka ba ïa ka trei ka ktah ka khih ka khan, la shem bad lap ruh ïa ki Mohkhiew Khasi, ki bym ju don ne ïohi ha kiwei kiwei pat ki bynta jong ka Ri India, lane ha ka pyrthei hi baroh kawei. La lap ruh ïa ki dak, jong ka jingdon jong ki shlem ki ba la saiñ, ïa shibun ki tiar ki tar, kiba la pyndonkam haduhmynta.
Ki paid nongshongshnong, kham hadien ki la kynriah noh na ’Law Nongthroh, bad seng ïa ka Hima Mawbuh ha Umroi, hapoh jong ka jingsynshar jong u Syiem bad ka Dorbar jong ki Saw basan, ki jong ki kur Rangslang, Shylla, Mannar, bad ki Shadap. Ka raij Mawbuh, ka long mynta ka bynta jong ka Hima Mylliem, hadien ba la dhkat noh ïa ka, na ka Hima Shyllong.
Kumta wat lada wan lyngshop, ki erlangthari, u kyrtiah, u lyoh, u palam bad ka um, hynrei ki Hynñiew rong ka Tangnub, ka Tangjri, ka Tangngiah ka Tangchrai, jong ka Jiengkieng ksiar kin ïa long ka kular, ka jutang, ka jubat, ba u Blei, Nongbuh Nongthaw un lam lynti.