… ka ba bteng
U Swamiji u la sah ha Mayavati kumba artaiew. Wat la ka met jong u ka la tlot, hynrei ka jingitynnad ka mariang ka la pynlong ïa u ba un ïaid kai bun kynta shapoh khlaw bad sha lum khlem da pynsngew ïa ka jingkhriat bajur. Ynda u la wan phai na Mayavati, u la sah kumba katto katne taiew ha Belurmath. U la leit ruh sha East Bengal bad Assam ban leit peit kai ïa ki jaka khuid bad kyntang. Hakane ka sien ka kmie jong u ruh ka la leit ryngkat. U Swamiji u la wan phai pat sha Belurmath hadien khyndiat taiew, ha u ‘nai Jymmang 1901. Hakane ka jingleit u la leit peit ïakine ki shnogn, Nangalbandh, Kamakhya bad Shillong. Ha Dacca bad Shillong u la kren hapdeng jong ki katto katne ki jingïalang.
Haba u Swamiji, u la wan phai sha Belurmath, u la im ka jingim ba palei, u ïaid kai, ïengkai, u trei u ktah ki kam ïing, kam sem kat kiba kynduh. Nalor kata ruh u hikai ïaki synran jong u. U ju sngewbha eh ban ïakhleh lang, ban ïakren kai, ïathuhkhana bad ki nongbylla Santhals, ïa kiba la ñiew kum ki jait ba poh. Ha kawei ka sngi u la pynbam khana sngewbha ïaki. Ynda la dep ka bam ka dih, u la ainguh ïa ki, u da ong ha ki; “Mynta ka sngi nga la pyngsngewbha ïa u Trai Kynrad da kaba ai bam ïa phi.” Ha ki taiew khatduh ka snem, u Swamiji u la pdiang sngewbha ïa arngut ki riewniam bastad jong ki Buddhist. Kine, ki la khot sngewbha ïa u ban wan sha ka Dorbar bah ki niam ka ban sa long. Hynrei ha kane ka kynti, u la kyntait ïakata ka jingtyrwa. U la shu leit on lynti ïa ki sha Bodh Gaya bad Varanasi. Ha Varanasi, u la sngewbha eh ban ïohi ba ki samla ki la sdang ban pyntrei kam ïa ki jinghikai jong u, kum ha kaba sumar ïakiba duk bad shitom.
U Swamiji, u la sngewthuh halade ba ki sngi jong ka jingim jong u ha kane ka pyrthei ki la jan wai. Kiei kiei ba u leh bad kren ki long ban pynshai ha ki nongbud jong u shaphang kata ka jingsngew. Hakawe ka por u la ong ba ki diengrit kim lah ban san hapoh ka jingkah syrngiew jong u diengbah. Ha ka sngi thohdieng, 4 tarik u Naitung 1920, u Swamiji, dang step u la leit sha ïingmane. Hadien ba u la khang lut ïa ki jingkhangïit bad ki jingkhangbah u la shong puson hangta haduh lai kynta. Hangta ruh u la rwai ki jingrwai ainguh ïa ka Blei Kali, ka Trai Kynrad. Ki synran bad nongbud jong u, kiba don habar, haba ki la ïohsngew ïa ki jingsngewthiang ka jingrwai ki la sngew lyngngoh. Dei ka dak jong kaei-kaei ka ban sa jia? Ki ia kylli iwei-ïa-iwei pat.
Haka por shiteng sngi, u la bam ja ryngkat bad kiba shong hangta. Kane ka long kaba um ju leh mynshwa. Ynda la dep bam u la hikai Sanskrit ïa ki nongbud jong u. Hadien kata ryngkat bad uwei u synran jong u, u la ïaid kai sawdong kata ka jaka; u da ïathuh ha u ba u thmu ban seng kawei ka Vedic College hangta. Ha ka por janmiet ynda la dei ka por ban leit sha ïingmane, u la leit sha la ka karma. Hangta u la shong puson kumba shi kynta. Hadien kata u la thiah halor ka jingthiah ryngkat bad u Rosary ha ki kti jong u. Kumba shi kynta hadien u la ring mynsiem jylliew; hadien kumba ar ne lai minit u la ring mynsiem jylliew biang. Hadien kata dap tang da ka jingjarjar suda, u la iohthiah bym lah shuh ban kyndit. Haba peit ïa ka khmat jong u I kum u khyllung ba ïohthiah lyngngai ha ka pneh ka kmie jong u. Ka mynsiem ba thait jong u Swamiji mynta ka la jah thait. Ka la rung sha ka ri ha kaba kan ïoh ïa ka jingjahthait bymjukut. U Swamiji ha ki por mynshuwa eh u ju kren kumne; “Ka mynsiem jong nga kan mih noh na ka met jong nga, kumba bret noh ïa ka riam ba la jot. Hynrei ngan nym sangeh ban trei kam; ngan pyrsad mynsiem ha man la ki briew kylleng ka pyrthei haduh ba kin da tip bad sngewthuh ba ngi ïa long lang kumjuh ha khmat u Blei!”
