U la sah ha Colombo kumba katto katne sngi. Ka nam jong u ka ba u la ïoh ha ri nongwei ka la iaid ha shuwa jong u. U wan poi ha Madras hadien ba u la sah katto katne sngi ha Colombo. Ki briew na kylleng ka ri, barit bad bakhraw kumjuh ki la wan ban ïakynduh ïa u. Ha man la ki shnong barit ne bakhraw, ki la seng la ki jingïalang ban pdiang burom ïa une u Riewkhraw. Ha Madras u la kren ha ki san tylli ki jingïalang bakhraw. U la kyntu jur ïa ki briew ba kin ïehnoh ia ki jingsniew baroh bad jingngeit bieit baroh. Ula kyntu jur ba ki dei ban tei ïa ka India bathymmai. U la pynpaw shai ba ka lad ka babha bad shisha ban tei ïa ka India ka long ba dei ban seng nyngkong ïa ka Niam kaba hikai ïa ka jingsngewïaieit kum shipara satlak ka pyrthei. U la kynnoh bad pynrem ïa kito kiba don ka mynsiem ia bishni bad jingsngew kor jait ïa kiwei pat. U la kren jur ha ki briew baroh ba ïa ki jinghikai ba la thoh ha ki kot niam Upanishad bad Puranas dei ban pynphriang ha ki briew, ym ban shu set op ha ki ïingmane Blei.
Na Madras u Swamiji u la wan sha Calcutta. La pdiang burom ïa u da u paitbah byllien. Ban pynskhem ïa ka jingthmu jong ka jingtrei jong u, u Swamiji u la lum lang ia ki nongbud jong u baroh bad u la khot ïa ki ban don lang ha kawei ka jingïalang. Ha kane ka jingïalang la sdang ïa ka Seng Ramakrishna Mission ha u bnai Jymmang, 1897. Ka jingthmu jong kane ka Seng ka long ban trei na ka bynta ka jingbha lang met bad mynsiem kumba la hikai u Ramakrishna. Naduh u bnai Jymmang haduh ba kut ka snem, u la ïaid kylleng ki jaka jong ka India ba shatei. Kat shaba u leit, ki Raja bad Maharaja ki kloi ban ïakynduh bad ban ïarap ïa u. Hadien ba u la ïalap kylleng ki jaka, u Swamiji u la leit sha Amarnath ryngkat bad ki synran jong u. Ha kane ka por ka Sister Nivedita ruh ka la leit lang bad u. U la pynlut bun sngi ha kaba puson ïa U Blei bad kaba duwai. U la ïathuh ha ki nongsynran jong u ba katba u dang don hangne U Blei Siva u la paw ha u. Bun bun sngi u ju ïathuh khana tang shaphang jong U Blei Siva. Naduh kane ka sngi ka jinglong jong u ka la kylla bak lybak na kaba ju long mynshuwa.
