(ka ba bteng)
Ka Jingim ba shabar jong ka, ka long hi kum ka ’thei ïap lok. Ka don ki lyngkha kba bad nangta ka ïoh ïa la ka bam. Ka ju thung jhur ha kper bad ka ju bam ja suda khlem mluh bad shi kyntien ruh kam ju khñium, pynban la tip ïa kane bad kumta ki nongbud u Sri Ramakrishna ki la lum pisa bad ki la khot noh ïa ka ban sah ha Calcutta. Ka la pdiang ïa ka jingkhot sngewbha jong ki bad ka la leit ha u bnai Lber jong ka snem 1888; ka la wan phai pat sha Kamarpukur, ha u ‘nai Lber jong ka snem 1889 bad ka la sah hangta sa shi snem.
Naduh kane ka por ka la sah ha Calcutta bad ha shnong jong ka, ha Jayrambati. Lehse namar ka jingsngew na ka bynta ki ba ha ïing jong ka bad namar ba ka kynjah marwei ha Kamarpukur, ka la leit sah noh ha Jayrambati, hynrei ban pyndep ïa ka jingkwah u Sri Ramakrishna ka la pynlut pisa ruh ban maramot ïa ka ïing kaba ha Kamarpukur.
Ïa ka jingim jong ka la bynta ha ki ar-bynta, kawei ha kaba peit ïa ki kam ïing bad kawei pat ha kaba kyrsiew ïa ka jinglong mynsiem ha ka dohnud jong kiba bun bah ki briew ‘kynthei bad shynrang’ kiba wan ban wad jingsuk, jingtip bad ban aiti lut. Kumba ngi ïohi ba kawei ka jingjïa ka bud hadien kawei pat ha ka jingim jong ka; ha kawei ka kti ka bat ïa la ki hynmen kiba mutlop, ba runar da ka jingieit, bad ka jingiaishah ïa ka para kynsi ba sniew bad ka khun ba runar, bad ha kawei pat ka ïa leh ïa ki kam ba kynja mynsiem kum kaba ai bor ïa kiba tlot, kaba pyntngen ïa kiba sngewsih bad kaba ai jingkyrmen ïa u nongpop ba la rem bad ngi sngew lyngngoh haba ngi ïohi ba ka long kaba biang lut ha kine baroh.ka jingjai jai ka ïaid ryngkat bad ki kam jong ka baroh. Kane ka la ïaid ryngkat bad ka wat hapdeng ki jingeh kiba kumno kumno ruh, kumba kine ki jingjïa harum ki pynshisha.
Shisien lehse ha ka snem 1877, ka Kmie Bakhuid ryngkat bad ka kynhun ki la mih na shnong ban leit sha Dakshineswar da ka kjat. Ki la dei ban ïaid lyngba kawei ka jaka kaba kynjah kaba dap da ki ‘riewsniew bad ki nongtuh Haba la janmiet kata ka kynhun ka la kwah ban poi ha kata kawei ka shnong kaba kyrteng ka Tara-keswar, shuwa ban lap ka miet. Hynrei ka Kmie Bakhuid, namar ba ka la thait kam lah ïaid ryngkat bad kita kiwei pat, kumta ka la Shah ieh noh bad ka la bakla lynti, hangta ka la Shem ba ym don mano mano ruh hynrei tang marwei. Haba la sdang dum, ka la ïohi ïa uwei u briew uba jrong u da bah halor ka tyrpeng ïa ka tari ka-ba jrong. U dei uwei na kita ki nongtuh. Ka Kmie Bakhuid hangta ka la ïeng sah. Haba u la iohi ïa ka uta u nongtuh u la kren da ka sur kaba eh, ‘Mano kane kaba ïeng hangne katta por? ‘ Da ka sur kaba jem ka Kmie Bakhuid ka la jubab, ‘Nga la bakla lynti namar ba dum. Ko Pa jong nga, hato phin iarap ianga, ban pynwad ïa ki paralok jong nga?’ Markumta, kawei ka kynthei ka dei ka lok jong uta u nongtuh ka la mih. Ka Kmie Bakhuid ka la leit sha ka bad ka la bat ïa ka kti jong ka bad ong, ‘Mei, nga long ka khun jong phi, ka Sarada. Nga don mynta hapdeng ki jingjynjar. Nga la donbok shibun ba nga la shem ïa i Pa bad ïa phi hangne, lym kumta ngam tip kumno ngan leh.’
Uta u briew bad ïa ka lok ki ïa shah shkor ïa ki ktien bathiang jong ka Kmie Bakhuid. Kum ki kmie ki kpa ki la sngewsynei ïa ka bad ki la sumar ïa ka ha kata ka miet bad haba ka step ka la mih ka la leit noh ban bteng biang ïa la ka lynti bad ban wad ïa la ka kynhun bad ki la sngewtynnad shi katdei eh ïa ka.
Kawei pat ka jingjia ka la long haba ka Kmie Bakhuid ka la don ha Kamarpukur. U Harish, u nongbud jong u Sri Ramakrishna u la lamwir. Ha kawei ka sngi u la sdang ban beh ïa ka Kmie Bakhuid. Namar ba ka long marwei bad kam tip kumno ban leh. Ka Kmie Bakhuid ka shu her pyllun pyllun ïa uwei u dieng ha phyllaw bad u Harish ruh u la beh nadien nadien jong ka. Hadien ka la leh shlur bad ka la peit markhmat ïa u. Ka la shim bad bret ïa u ha khyndew bad ka la shon da ki khohsiew jong ka ïa ka shadem jong u bad ka la thap ïa u haduh ban da saw ki kti la jong bad nangta u la sdang ban dkut mynsiem.
Ha ba ngi pyrkhat ïa ka jinglong babha bad ba jemnud jong ka, ka pynlyngngoh shibun ïangi ïa kane ka jingleh jong ka ïa u Harish. Ka jingleh khlaiñ bor jong ka kaba ngim ju poi pyrkhat ka la pynkyndit ïa ngi tad ynda ngi kynmaw ïa ka jingong u Swami Vivekananda ba ka jinglong khuid ka long ka bor ba khlaiñ tam ha pyrthei. Ka jingim ka long ka jingtynjuh ïa ka niam bad dei ka bor mynsiem ba u briew u lah ban kiew shaphrang bad ban ïa kynduh ïa ki jingeh khlem tieng.
Ha ka snem 1890, ka Kmie Bakhuid ka la leit ïaid pilgrim sha Gaya bad ka la leit jngoh ruh ïa ka Bodh Gaya, ha kaba u Buddha u la ïoh jingshai. Hangne ka la duwai ïa u Blei ba un pyndap ïa ka bam ka dih, ka shong ka sah ki khun jong ka, kiba long ki nongbud u Sri Ramakrishna khnang ba kin nym im da kaba khrong na kawei ka ïing sha kawei pat. ïa kane ka jingkwah la pyndep da kaba tei ïa kawei ka jaka shong ha Belur ha ka snem 1899.
