… ka ba bteng
Naduh kane ka por, ka Kmie Bakhuid ka la pynlut ïa la ka por tang ha kaba ïaid pilgrim. Ka Ja leit arsien sha Puri bad haba ka la leit jngoh ïa ka ïingmane, la ïohi ïa ka dur jong u kynrad u ba shong halor ka duwan kaba jrong bad kane ka la ktah jur ïa ka mynsiem jong ka. Ha ka snem 1911, ka la leit ïaid pilgrim sha Rameswaran. Hangne u syiem jong ka Ramnad, u ba long u nongbud jong u Swami Vivekananda u la ai ïa ka ka ïingmane kaba kyrpang bad kaba donburom. Ka la leit sha Vrindavan sa shisien bad sha Banaras lai sien bad ka jingleit kaba khatduh eh ka la long ha ka snem 1912, haba ka la leit jngoh ïa ka jingtrei jong u Sevashrama u ba na ka Ramakrishna Mission. Hynrei hangno hangno haba ka don, ha Calcutta, lane ha Jayrambati ne ha ka jingiaid piigrim, ka don artylli ki jingthmu jong ka, kawei ka long ban peit ïa kiba ha ïing ha sem bad kawei pat ka long ban peit ïa kito kiba wad ïa kiei kiei kiba kynja mynsiem kiba long hi kum kiba ha ïing ha sem. Kine artylli ki jingthmu ngin sa peit bha hadien.
KA JINGLONG ÏING LONG SEM
Ka Kmie Bakhuid Ka long ka khun nyngkong. Ka ju ïarap ïa la ka kmie ha kaba ri bad pynheh pynsan ïa ki saw ngut ki para shynrang ki ba bud ïa ka, bad ha ba ki la ryngbah ruh ki shaniah ha ka. Baroh ki long kiba duk ha ka bor met bad kumjuh ruh ha ka liang ka mynsiem bad ka jingieid jong ki ïa ka Kmie Bakhuid, ka long tang haba ki ïoh peisa. Haba ka la leit sha Jayrambati ka la shimti ha lade ïa ka kam ïing kam sem, kum kaba dung kba kaba shet jingshet ïa ki bad wat ha ka ba ri ïa ki khun jong ki. Uwei pa uwei na ki uju pyrkhat ba ka hynmen jong ki ka kham ieit ïa uwei pat bad kane ka la pynlong ïa ki ban ïa nia khlem sangeh. Ka Kmie Bakhuid shisien ka la ong, ‘Ki nang ban pan tang ïaka peisa. Hato ki ju kylli mo shaphang ka jingstad ne kaba aitilut ? ’
Uba khadduh bad uba bha tam na ki para shynrang baroh ula ïap bad la sah sa tang ka lok jong u, ka Surabala bad i khun iba dangpun ha ka kpoh bad u la ieh noh ïa ki ha ka kti bad ka jingsumar ka hynmen jong u. Ka Surabala kam lah ban shah ïa kane ka jingjia namar ka long kaba rit mynsiem bad kane ka jingjia ka la pynbakla ïa ka jinglong jong ka bad dei kum ha kane ka por ba sngewsih sat ba i khun kynthei jong ka, i ba kyrteng i Radhu la kha ha ka jingduna jabieng watla im da long khlehbieit eh.
Ka Kmie Bakhuid kam ju klet ïa la ka kular ïa kaba la khlei, ha la u jong u para u ba la khlad noh, bad ka la shimti ha lade ïa ka Surabala bad Radhu bad ki ju leit ryngkat bad ka sha Calcutta na Jayrambati bad ban wan phai pat sha la shnong. Ka ju pynpaw barabor ïa la ka jingieit ïa ka Radhu, hynrei kine baroh shi kmie shi khun ki pynshitom sat ïa ka jingim jong ka. Ka Surabala ha ka jingbym tip briew ka ju bishni, ba ka Radhu ka ieid ïa ka Kmie Bakhuid, katba barobor ka ju kynnoh beiñ ïa ka ba ka pynshitom ïa i khunlung. Ka ju pynphai ïa ka nongkylliang jong ka Kmie Bakhuid bad ki jingtim jingtla. Haba don briew ruh, kam ju pynsngew ïa ka Sarada. Ka ju tim ju tla hynrei ka Kmie Bakhuid kam ju pynshah shkor bad ka trei la ka jingtrei bad kane ka la pynlong ïa ki nongbud jong ka ban sngewphylla ïa ka jingjai jai jong ka.
Ka Radhu ka la long ka khynnah ka bym kohnguh, kaba mynthi ba tim ba tla kum ka kmie hi, bad ka ju bitar ruh ja ka Kmie Bakhuid khlem da suidñiew ïa kiei kiei kiba ka la leh. Ka ïai shong hi bad ka Kmie Bakhuid wat la ka shongkurim ruh. Ka jingsniew jong ka ka la poi haduh ba ka la dih kani hadien ba ka la ioh khun. Ka la tlot haduh ba kam lah ïaid shuh. Ka Radhu ha kawei ka sngi ka la wan par sha ïing ka Kmie Bakhuid bad ka la rah shi sien dih u kynja haba i khun jong ka i dang dap hynriew bnai. Ka Kmie Bakhuid ka la ong, ‘Radhu balei phim ïeng? Ka bym lah long ïa nga ban ïohi biang ïaphi. ’ Ha ka jing- dom bymtip briew shuh, ka Radhu ka la shim u wei u khiew u baheh bad ka la kawang ïa ka da uta. U la dei ïa ka Kmie Bakhuid na u ingdong khala khala kata ka jaka ka la at bad ka la shitom jur, hynrei wat la katta ruh ka kynmaw tang ïa ka Radhu. Ka la shim ïa i symboh khyndew na ka kjat jong ka bad kala buh halor ka khlieh jong ka Radhu, ka la kham ïa la ki kti bad ka la peit ïa ka dur u Sri Ramakrishna bad kala ong, ‘Ah Trai, to map ïa ka namar kam tip ïa kaei ba ka leh. ’
Ka jingïaishah ka long ka jinglong kaba bha bad kaba la judon khamtam ha ka jingmut jong ki nong India.
Ka jingim u Shri Ramakrishna ka iai sah hi ha ka ïingmane jong ka blei Kali bad u iai don ryngkat bad ka Kmie Bakhuid wat la ym ïohi ruh. Ka jingim ka Kmie Bakhuid la shisha ka long kaba eh bad bym sngewtynnad pynban ka jingïaishah kaba khraw ka paw hi ha ka jingim jong ka ïa kaba u Sri Ramakrishna u la pynpaw shai.
Yn dang bteng…
