… ka ba bteng
Na Amarnath u la leit peit bad ïalap ha bun ki jaka. U la wan poi ha Calcutta haka 18 tarik u Risaw. Naka bynta ka jingleit jong u sha bun ki jaka kylleng ka ri, ka met jong u ka la tlot bad bunsien u ju kem pang. Hakane ka juh ka por la sdang ban tei ïa ka ïingniam ha Belur. Wat la u Swamiji u la ju kem pang, hynrei u pynïaid hi dalade kumno ban tei ïa kata ka ïingniam ha Belur. Kane ka long ka jaka pdeng kaba pynïaid ïa ka Ramakrishna Mission baroh kawei, la tip mynta kum ka Belurmath. Ha u bnai Kyllalyngkot, 1897, baroh ki riewniam jong ka Mission, ki la leit sah ha Belurmath. Ha u bnai Lber, 1899, u Mr. bad Mrs. Sevier, ki nongbud ha Bilat ki la seng ïa ka ïingniam ha Mayavati halor ki lum Himalaya. Ha kajuh ka por u Swamiji, u la pynshlur bad ai mynsiem ïa ki nongbud bad ki nongsynran jong u ban pyllait im ïa la ka mynsiem bad na ka bynta ki para briew.
Ha u ’nai Jylliew, 1899, u Swamiji ryngkat bad ka Sister Nivedita bad u Swami Turiyananda ki la kiew lieng na Calcutta ban leit sha Amerika. Haba u la poi ha New York, u la sngewbha shibun ban ïohi ba u Swami Abhedananda u la ïaid shaphrang ha ka jinghikai ïa ka Vedanta. U Swamiji u la leit sha California, hangta u la seng ïa ka Vedanta Centre ha San-Francisco, Oakland bad Alameda. La ai sngewbha ïa u Swamiji katto katne ka khyndew ha Santa Clara. U la ong ïa u Swami Turiyananda ban seng ka Ashram hangta ban hikai ïa ki synran jong u shaphang ka rukom im jong ki riewniam. Ha u Naitung 1900, u Swamiji u la leit sha Paris, namar la khot sngewbha ïa u da ka Congress of the History of Religions (Ka Dorbar jong ka histori ki Niam). Na Paris, u Swamiji u la leit sha Egypt, lyngba ki nongbah Vienna, Constantinople bad Athens. Hakane ka sien leit jngoh kaba arsien ïa ki ri Sepngi, u Swamiji i kumba u pynlut bun ka por haka ba puson ïa kiei kiei kiba jylliew, ki bym ïadei eiei bad kane ka pyrthei. Ha Egypt, kane ka jingpuson ka la long kaba jur tam. Kaba khmih thuh i kumba u Swamiji u la im daka jingim kaba thymmai.
Haba u la sah katto katne ha nongbah Cairo ha Egypt, u Swamiji u la kwah eh ban wan phai noh sha la ri u la ïohi lypa ïa ka jingïap jong u nongbud jong u, u Capt. Sevier. U la poi ha India ha ka 9 tarik u Nohprah 1900. Ka jingwan poi jong u ka la pynkyndit bad pynsngewkmen ïa ki synran bad nongbud jong u; namar u khlem da pyntip lypa ïa ki. Ynda u la poi u la ïoh ka khubor ba sngewsih ba u Capt. Sevier u la khlad noh ha ka 28 tarik u Risaw 1900. U la mih na Belurmath, ban leit sha Mayavati ban pyntngen ïa ka tnga u Capt. Sevier.
Yn dang bteng…
