La pynwan sha ka khasi da
U L Hardinge Pde bad Ka Streamlet Dkhar
…Ka ba bteng
Ynda poi ha Ekavrata, u Vyasa u la pynithuh ithaw bad kawei ka ïing babha kaba ai jaka shong jaka sah ïa ki. Hangne ki la shong suk, hynrei teng teng ki kynmaw da ka jingbitar ïa ka jingshet shukor ki bakha jong ki. Dei tang u Yudhisthira uba ju pyntngen bad ai barobor kata ka phang jingstad jong ka jingkyrmen. Da kumne ki pynïahap sur noh ïa kata ka jingim jong ki. Kumta man ka sngi kumba leh ki Brahmin baroh, ki leit kylleng ka shnong bad ki khrong na ki ïing bad wan rah pat ïa ki sha la ka kmie kaba pynïabynta hapdeng jong ki. U Bhima pat uba kham dawa shibun ka bam, u ïoh ruh kham bun. Te da kumne ki ïa im. Da kata ka jingim ba synlar. Hynrei ha kawei ka sngi ki ïohi ba kita ki nongkhot ïoh ki ïa don ha ka jingnsgewsih bad ka la don ka jingtyrkoh bajur hapdeng jong ki. Ki la ïohsngew ïa ka jingïakren bad ka jingïaïam briew hangta haduh ba ki Pandava kim banse shuh ban kylli kaei kaba la jia. Kita ki briew ki sa ïathuh, “Ha kaba kut kane ka shnong shong uwei u rakot uba pyllait im ïa ngi tang lada man ka ïing ki phah shi kali ka ja bad ar tylli ki muid kiba dei ban leit ai da uno uno uba shong ha ka ïing. Une u rakot u la long uba jlawnguid haduh katta katta, ba u bam ym tang ïa kata ka ja shi kali bad kita ki muid, hynrei ïa u nongleit rah ruh. Ngim nud ong ei ei shuh namar un tang shu tip, u la maham ba un bam duh ïa ka shnong baroh kawei. Kumta man ka ïing ki ïoh la ka pali. Mynta ka dei ka pali jong ngi. Nga kwah ba kine kiba dang bun rta ba kin lait. Hynrei baroh na ngi ngi ïa tyrwa marmet ïalade ban pyllait im iwei ïa iwei pat. Ym tip shuh. Kaba bha eh ka long ba ngin ïa leit lang baroh ban ïa kaba shah bam kumta ba ngin ym ïoh lad ban ïam briew na ka bynta jongno jongno ruh. ”
Kane ka la pynlyngngoh ïa baroh. Ka Kunthi te kum ka kmie ka la ong ïa u Bhima ba un leit rah ma u ïa ka bam sha u rakot. Hynrei u Yudhisthira u mut ban pynsangeh namar u ong “ba ngim lah ban shu kheiñ duh ïa u Bhima, u Arjun ne ki kha synrap. Ai ngan leit rah ma nga ïa ka bam sha ïing u rakot. Wat lada nga ïap ruh Bhima bad u Arjun ki dang lah ban synran synrop ïa phi ha ki por ba eh bad ba tan.” Ka Kunthi ka la pyneh ka ong, “Ai ba u Bhima un leit, un sa wan phai pat phin sa lohi.”
U Bhima te u leit bran bad ñiah ïa kata ka kali kit ja bad artylli ki muid bad poi tiap ha kata ka jaka. Un sa beh ïa kita ki muid sharud bad khot kat lah kat ïai ïa uta u rakot da ka kyrteng bunsien, “Baka, wan shane. Ale, me khun ka mare, ale peit ïa nga ba nga dang bam.” U da bam hi noh artad ïa kata ka bam. Uta u rakot u wan mareh shata da kaba kyrdem kjat bad uba itriem shisha ban peit. “Me dei uei mame uba khot ïa nga da ka kyrteng?” Hynrei kane kam pynsalia ïa u Bhima uba shong la ka shong kuman bad bam la ka bam khlem khih wat tang uwei ruh u ñiuhmat. Kane ka la nang pynïngkhong ïa uta u rakot. “Me dei uei te mame uba bam kine ki jingbam jongnga. Shano ki muid ?” U la kyrhuh. U Bhima u shu kylli, “Are ki muid te ki leit bam phlang hangthie harud nong,” u Bhima u la ong shuh shuh “Mynta ka sngi phin ym ïoh bam ïa kine kiei kiei. Me dei ban shah jingit.” Wat la u rakot u kura u bok nadien, u Bhima u shong ngun ngun u bam, hynrei u shu ong, “Peit ho lih Baka, ngam ju sngewtynnad kane ka jingpynthut ïa nga haba nga dang bam. Me dei ban nang ban ap”. Kane ka la pynlyngngoh pynban ïa u rakot, U ai sa shi bok ar bok bad pyrshang ban pajut patrong na met, hynrei u Bhima pat um khih, u thap pynban ïa ka kti u rakot kumba thap skaiñ. U pyrshang ban ñiat ïa u Bhima ban ïoh bam, hynrei um lah ban pynkhih, bad weng ïa ka kti u Rakot kumba kyndat ïa ki kti shrieh.
Figure 1Bhima and Bakasura by Ravi Varma.
“Nga lah thgan te me!” kyrhuh u Rakot, “Ngan bam ïa me!” la khynwin ka khlaw.
“Nga tip ïa kata,” la kyrhuh sa u Bhima, “Khun ka jlawnguid, nga tip ba me leh ïa kito kiba wan rah bam ïa me kum ki shyieng sohkhia muid. “Mynta te me la kut ka sngi”.
“Me men bam ïa nga?” la kren phoilia u Rakot.
“Em, mem ibang ei ei ruh. Hynrei ngan tar lyngkhot lyngkhai ïa me ban ïoh bam ki myrsiang bad ki pukni bhur. ” Katba u ïaleh ban ïoh bam kata ka bam, um ïohlad namar ba ka long pynban kumba ïalehkai bad u khyllung. Kumne haduh ban da lut khoit kata ka bam. U Bhima u sa ïeng bad ïaleh bad uta u Rakot. Hangta ki ïa rat ïa ki dieng bad ïa sympat. Ki rah ki mawlong mawteh ban ïa kawang. Hadien ki sa ïa kura kudung. Ha kaba khatduh, u Bhima u rah ïa uta u rakot bad lynthem syik ha madan. U shim ïa uta u rakot na ryndang u ïuh de thrait bad khyrwait pynkheiñ artad ïa u budlum bad ryndang thrut-rut-rut.
U paid ka shnong u la kmen haduh katta katta ïa u Bhima, hynrei ki la dap da ka jinglygngoh kumno u Brahmin u lah ban leh kine ki kam shlur kiba ïa dei ban leh tang ki Kashatriya. Ki Pandava te ki ïa batai ba dei tang U Bhima marwei uba la ïoh ki jingbit lyngba ki duwai siat kiba rieh, kiba lah ban pynliem ïa uno uno u nongshun.
Ynda la kumne, namar ki tieng ba ïoh ki briew kin tip shaphang jong ki, da ka mynsiem bakhia ki hap ban mih noh nangta na ka ïing basbun. Ha kane ka juh ka por, uwei u nongïaid lynti u la ïathuh ba u Syiem Drapuda jong ka Panchala u la pynbna ïa ka Swayamwara (Ka jingjied shynrang ka khun syiem ban long u tnga) jong ka khun jong u, bad ba ka pynbna paidbah ba uno uno uba don jingmut un wan ha ka sngi ba la buh ba ka khun syiem kan ioh jied.
Ynda U Drapuda u la shah jop ha u Drona, u la ïaid wir shane shatai haduh ba un da ïashem ïa u nonghikai (Guru) uba la ai ki jinghikai ïa u ban kha u khun uba lah ban pyn hiar kput ïa u Drona. Te ynda u la duwai bad kñia bun sngi ha kawei ka sngi lah mih ka ding kñia uwei u khun shynrang bad ka khun kynthei. Ïa une u khun lah kha bad ki tiar ïaleh thik kum uto u khla ka wait. La pynkyrteng ïa u, da u Dhrishtadyumna kaba mut la kha ha ka jingshlur, ki tiar ïaleh bad ki jingdeng kordor. Ka kynthei pat ka long kaba bhabriew tangba kaba ïong. La khot ïa ka ka Draupadi bad kumjuh ruh ka Panchali.
Ka jingjied tnga ka Draupadi ka long ka jingleh bym bit duh, te ki Pandava bad ka kmie jong ki, ka Kunthi ki la ïa mih ban leit sha Panchala. Hangta ha Panchala ki la ïa sah ha ka dong bym paw eh, ka dong ki nongthaw khiew. Kumba ju leh, ki ju mih dang step ban leit khrong bad wan ai pat ha ka kmie ban ïoh ïasam. Ha ka sngi jied lok ka khun syiem (Swayamwara) baroh kine ki san ngut shipara ki ïa mih lang ban leit. Ki la ïohi ba la pynkhreh ka madan baheh bad ki jaka shong ïa kito ki khun syiem ba kwah ïa pashat waidong. Bun bah ki khun syiem ki wan da ki kulai bad ki kali ïapom ki da deng ki jingdeng kiba da ki mar rem dor. La sdang ïa kane ka sngi da ka jingkñia da ki lyngdoh u syiem. Tang dep ka kñia ka khriam, la wan rung ka khun syiem Draupadi kaba la pynïap bieit bad pynkiew snam ïa ka khlieh kito ki khun syiem. La synran synrop ïa ka da u Dhrishtadyumna u hynmen jong ka hi uba long u khun syiem ka Hima. Nangta u la pynbna ba kito kiba kwah ban shah pyndeng syntiew da ka khun syiem ki dei ban pyndait ksai ïa kata ka ryntieh ba la buh hangta bad ba ki dei ban siat 5 tylli ki khnam sha ka sohpdung ba shad tawiar hynrei dei ban peit pat ïa ka dur jong kata ka shalyntem ha ka dur ba paw ha ka umphniang kaba don ha ka dabor.
Yn dang bteng
