Lehse, ba ngan shu batai ha phi lyngba ki laiň poitri,
Ngan ym da lah ban pynshong syngngeit ïa ka tamasa
Kaba phriang ha ki saw lynti ka lad Don Bosco Square.
Khnang ba phin sngewthuh sani bha Ïa kaei kaba ngan ïathuh ha phi
(Kum ba rung u ksai b’la khap pynnep phiak ha u thyrnia)
Kan bha eh, lada phi don ka por ban bijai ei,
Ba phin ïeng khlem kyrkieh
Kumba shiteng kynta ha kane ka jaka.
Ynnai bynñiaw ban shaniah ha ki jingker sorkar,
Ne ban pynkyrsum ktieh ïa ki ktang patlun
Ha ki lwer ka jingtlot ki nongmihkhmat jong ngi;
Namar kum kita ki jingker nar kiba kylliang man ka samoi
U phngit u ba sdien ha ki ‘sai mih tam ruh, un ym shan slem.
Ynda phi la poi ha ka lad Don Bosco Square,
Ka mon ka byllai – phi lah ban jied kawei na laiphew
Ki jaka ïeng ang-lyer, na kaba phi lah ban tianbishar Ïa kine kiba ngan kdew harum:
Lada dei ka sngi poh-ïa,
Ka mangkarong ka la sdang dang step.
U duhalia ka surok rong u kaweh ïa la ki kti
Bad u put tyngeh ïa ka bisil
Ban pynïaid ïa ki shalyntem u kynrem-u lyndan,
U duk-u suk bad u pdeng bynriew.
Kum u nongsakhi ïa kane ka jingpyni rong,
Phin ïohi kyrhai ki kali kiba tuid
Kum ka dewthala-Umkhrah ha u ‘nai Jylliew.
Shaid u briew bad ter ki khynnah skul,
Kiba, ha la ka kyrkieh, ki pyndep ïa la ka bynta ha ka tamasa
Kine baroh, lada phi ai lad ïa ki,
Kin lam ïa phi sha ka mynnor kaba sngur;
Bad ha kata ka lamwir, phin kynmaw
Ïa ka paralok kaba ju ïa shong skul lang bad phi
(Ka long kumno?)
U ‘rangkynsai uba ju ap ïa phi ha shiliang kane ka wah (Shano u poi?)
Ka nongdie sohphie kaba phim ju ïohi shuh
(Ka la shong pat hangno?)
Lehse, lada la thoh, kin sa wan ïashim bynta biang
Ha kane ka tamasa ha kawei pat ka por.
Ha kane ka khlaw dewbilat,
Yn ym don ba pushe ïa ka ïeng alhia jong phi.
Ha kaba kumno eh, phi lah ban shah lymbup
Ha ki samla lud kiba bat la ki pla kieng ka jingkhia kaba kat ka jingsarong.
Kin pynran ïa la ki ñiuhmat bad phai wak da ka bitar.
Ka bha ba phin ba shu ong map bad sammut lane excuse me!
Namar ka kham phalang hi ka English ha kine ki akhia ka skulbah.
Ynnai ïa kynad halor kaei kaba phin klet noh tang shipor.
Ynda phi la kyndit noh na ka jingshahpeit-matdong,
Ka jingtngen ka ap ïa phi ha ka sha ka dud na ki dukan
Kiba ki bun pateng ki ieit bad ñiewkor.
Hynrei, kumba ong ka khlieng ka tyngab:
U khiew ha kine ki dukan kham ñiar ba un ïohi ïa ka kor khlieng tiar,
Wat la katta, ka sha ka shngiam kum kaba la tong na ka shyngiar blei.
Haba nga shong ha ki kyndong kine ki dukan
Kiba bat ha la ki miej lati ïa ka kmen bad ka sngewsih u ba bun balang,
Ngam lah khlem da peitthuh ïa ki khana kiba ki nongshong dihsha
Ki tyngkhap ha ki khylliap shyllang kiba kit khuslai,
Ha ki ‘matïong kiba jylliew da ka jingthrang samla,
Bad ha ki rymmuiñ khynnah ki bym pyrkhat ïa ka lashai.
(Man u nongïashimbynta, phi ‘i, u wanrah buhrieh ha kane ka tamasa
Ïa ka jingim ba shisha ka jong u.)
Ngam ñiew ïalade kum u lorni, ïoh jia ba phi sngewthuh bakla,
Namar ïa ka jingïakhana, ngam pynshahshkor
Bad ïa ki pliang bam, ngam peit jawdud.
Nga ñiew ïalade tang kum u nongpeit-ïapmat
Ïa ka jingjanai da kaba baroh ki nongshimbynta ki pyndep ïa la ka kamram.
To, ngan ïeng noh manga na kane ka jaka.
Nga ïohi ba bun ki la wad jaka shong naduh mynne.
Sa shong noh maphi, paralok,
Ka bam jong phi ruh katei ka la wan.
Ha shwa ba ngan aiti noh ïa ka bynta ka jong nga,
Pdiang shikyntien kum ka bhet ka bhar ïa khlad:
Ynnai ud ‘nai khñium ba khapngiah, ne thlia ba shit,
Ne wohdong ba ym don ba kren,
Haba phi ïeng ha ka lad Don Bosco Square;
Namar lada baroh ngi long nongshimbynta, mano mo u ban peitkai?
.jpg)