… ka ba bteng
KA JINGIADEI BAD KI PARA BRIEW
Ngim dei ban mut ba ka jingieit kmie jong ka ka kut tang bad la ka nongbud. Ki briew kiba duk bad ba donkam ki ïohpdiang kumjuh ka jingieit bad jingisnei na ka. Ka ju ïarap ïa kiba shem jynjar da ka peisa, ka bam ka dih lane da ki jaiñ ki nep katba lah la i bor barit. Ka sngewtynnad shi katdei eh shaphang ka Mission jong u Ramakrishna hangno hangno ba ka don kane ka Mission, ka ju kylli bñiah ïa ki jingtrei ba bha jong ka.
Kawei pat ka dak jong ka jingieit kmie ka long ba ym ju peit ïa ki jing-bakla kiwei. Shisien, haba uwei na ki nongbud uba kyrteng u Golap-ma u la mai ïa kawei ka shakri, bad haba ka Kmie Bakhuid ka la kylli, u Golap-ma u la jubab da kaba ong 'Mei, kan myntoi aiu ban ïathuh ïaphi haba phim ju ïohi ïa ka jingbakla kiwei pat? Da ki ktien ba jem ka la jubab, Niuma Golap, ym don dak shuh ha kita ki briew kiba ïohi ïa ki jingbakla jong kiwei pat. Ka pyrthei kan nym long kumne lada ngan long da kumwei pat."
Ka leh ïa kiei kiei baroh ha ka kyrteng jong u Ramakrishna. Ka thung ïa ki nongbud ha ka kyrteng jong u Ramakrishna, ka ju duwai ha u na ka bynta ka jingbha jong ki bad ka ïaleh katba lah ban pyni ïa ka dak jong ka bneng ha u briew bad kam kwah burom eiei. Ka kheiñ ïa lade ba ka im tang namar u Sri Ramakrishna bad ban pynïar ïa ka kyrteng bad burom jong u. U Swami Abhedananda u la thaw ïa ka jingrwai ïaroh shaphang jong ka kumne:
Ka dohnud bad ka mynsiem jong ka ka long tang shaphang u Ramakrishna.
Ki shkor jong ka ki bang ban ïohsngew ïa ka kyrteng jong U. Ka met jong ka ka long ka jaka shong jong ki jingpyrkhat jong U,
Bad ïa ka nga ïai ai burom khlem kut trai.
Bunsien ki ktien kiba pynpaw ïa ka jingkhraw jong ka ki ju mih na ki rymmiang shyntur jong ka. Kham bunsien ki nongbud jong ka ki ju ri kyndong ïa ki kyntien jong ka wat la ka la ïaleh ban pynklet ruh. Kumta ka la ong ' Ïa ka jingithuhpaw ïa u Blei ka don ha ka slati jongnga. Nga ïohi ïa ka ha kano kano ka por ba nga kwah.' 'Wat kheiñ ïa nga kum kaba ha ïing jong phi. Nga lah ban iehnoh ïa kane ka met lada nga kwah. U Sri Ramakrishna u la iehnoh khnang ïanga ba ngan pynshisha ïa ka jinglong kmie jong u Blei ha kane ka pyrthei. Shisien uwei na ki nongbud u la ong ïa ka, 'Mei, haba ki briew ki ïohi ïaphi kim burom shuh ïa kiwei pat ki blei.' 'Balei kumta? ka la jubab, Kine baroh ki long ka bynta jongnga,'
KA BAKUT
Ha ka snem 1919, haba ka Kmie Bakhuid ka sah ha Jayrambati, ka la sdang ban shitom na ka jingpang khieshohrih. Kumta la leit ïalam noh ïa ka sha Calcutta ban sumar, hynrei ka jingshitom jong ka, ka la nang jur katta katta ba wat la ki doktor ki la leh shitom katba lah pynban kam ïoh bor satia. Ka jingshitom jong ka, ka la neh kumba san bnai bad ki kjat jong ka ki la at bad kam lah khie shuh na ka jingthiah.
Ha kane ka por ka jingmut jong ka, ka la sdang ban kylla. Ka jingim jong ka, ka la kylla long kaba sngewtynnad bad teng teng ka long kum i khyllung i ba dang hynñiew ne phra snem ka rta. Ka aiti lut ïa lade ha u Blei bad ka jingkren jong ka, ka long tang shaphang ka mon u Sri Ramakrishna. Ka jingjia ba kongsan ha kane ka por ka long ka jingïakhlad jong ka na ka pyrsa, ka Radhu. Ka la ong, 'Ïalam noh ïa ka Radha sha Jayrambati shisyndon. Wat shah shuh ïa ka ban shong hangne'. Ïa kito kiba kylli shaphang kane, ka jubab kumne, Ngam kwah shuh ïa ka'. Ka Radhu ka don ka jingïasoh bad ka pyrthei; bad dei ma ka kaba khanglad ïa ka ban pyrkhat shaphang u Blei. Haba ki nongbud ki la ïohsngew ïa kine ki ktien ki la sngewthuh ba ka bakut jongka ka la jan.
Kawei ka nongbud kynthei ka la wan jngoh ïa ka san sngi shuwa ba kan ïap. Ka la shong ha khmat jingkhang bad ka dohnud kaba khia ba ka da kwah ban ïohi ïa ka Kmie Bakhuid namar kim shah ban rung ïa ka. Ka Kmie Bakhuid ka la khawoit kti ïa ka ban wan hajan bad ka la pasiaw mian mian ïa ka bad ka la ong, 'Ngan ïathuh ïa phi kawei-lada phi kwah jingsuk ha ka mynsiem, wat ju peit ïa u thngiat kiwei. Hynrei ngi dei ban peit ïa la ka jingbakla. Khun, kane ka pyrthei ka long ka jong ngi bad ym don sohshnong'. Ki jinghikai ka Kmie Bakhuid ki long ka jingstad Philosophi, ka jingstad ñiam, ha kaba ym don ktien ha ka pyrthei ban batai. Lehse dei kane, ba la thoh ban jer kyrteng ïa ka, ka Sarada, kaba mut-kaba kynthup ïa ki jingstad baroh. Hadien ba ka la ai ka spah bah ba kordor eh ïa ka pyrthei, ka la khlad noh.Yn dang bteng…
