Ka Ha ki bnai ba hadien ka Parliament (Dorbar ), u Swamiji u la bun kam haduh katta katta, da kaba u ïaid na kawei ka Sorbah sha kawei pat, u da hikai ki jinghikai ba kynja mynsiem ba ka India ka la tip. La pdiang sngewbha ïa u da ka jingshongshit kaba khraw kumba bun ki kotkhubor ki pyni. Ha kawei pat ka bynta, ka jingjop jong u ka la pynmih ïa ki jingbishni khamtam ha kito ki Khristan kiba shongshit khleh bieit. Bun ki jingkylli bym lah ñiew shuh ba u la dei ban jubab. Bun na ki, ki kren pyrshah ïa u shaphang ki subject ïa kiba ki, kim tip ei ei. Ka Iowa State Record ka la thoh ïa kito ki jingjia:-
Ka long kaba sngewsynei ïa u briew uba shim bynta ban ïatainia bad u riewkhuid ha la ka jong ka nongrim...Ki jubab jong u (Swami) ki long kum ki jingthaba ka leilieh... Ki jingtrei-kam ka jingmut jingpyrkhat jong u kiba proh katta katta, kiba la don lypa bad ba la hikai bha, teng teng ka pynlyngngoh ïa ki nongsngap jong u, hynrei ka long borabor ka jingpule ba sngewtynnad tam. U Vivekananda bad ki kam jong u ki la ïoh jaka ha ki dohnud jong baroh ki Khristan bashisha.
Kane ka long ka jingmut ba u Vivekananda u la shon ha ka Mrs. Mary Funke, ka kynthei ba donburom bad badonnam jong ka Sorbah Detroit. Ka la thoh:-
Ka 14 tarik, u February, 1894 ka sah ha ka jingkynmaw jong nga kum ka sngi ba kyrpang, ba jar jar bad ka sngi bakhuid; namar ba dei hangta ba nga ïohi nyngkong eh ïa u bad shahshkor nyngkong ïa ka sur jong une u mynsiem bakhraw, u radbah ba kynja mynsiem, U Swami Vivekananda, uba hadien arsnem, ha ka jingkmen bad jinglyngngoh bakhraw u la pdiang sngewbha ïa nga kum ka synran jong u.
U la ju ai ki jingkren ha ki Sorbah bakhraw jong kane ka ri, bad ha katei ka tarik haneng, u la ai ka jingkren ba nyngkong na kiba bun jait ki jingkren ha Detroit, ha ka iingmane Unitarian. U paitbah ba bun u la ïalum bad pdiang sngewbha ïa u Swami da ka jingshongshit bad jingrisa kmen. Katba u dang leit kiew ha ka platform nga lah ban ïohi ïa u, u briew uba khaiñ, i shongkun bad ba i rangbah, bad ki kyntien ba u kren ki mih kum ki sur jingrwai...Ka don ka jingjarjar ba lah ban ïohsngew ïa ka jingring-pynhiar mynsiem u paitbah.
U Swami u la ai santylli ki jingkren paitbah bad u bat ïa ki paitbah ha ka kti jong u, namar ki jingkren jong u ki long kum ka jingkhum jong 'Ka kti U Kynrad' (Master hand); bad u kren kum uwei uba don la ka bor.
Ha ka jingmihkhmat jong u ha ka Brooklyn Ethical Society ha New York, ka Brooklyn Standard ka la thoh:-
"Ka la long ka sur jong ki riewstad hyndai (Rishis) jong ki Veda kaba la kren ki surthiang jong ka jingieit bad jingïaishah lyngba u Pukir Hindu, u Paramahamsa, Swami Vivekananda, uba la khring ïa uwei pa uwei na kito ki bun spah ngut kiba la pdiang ïa ka jingkhot sngewbha sha ka Brooklyn Ethical Society.. ha ka 30 tarik u December, 1894.
Ki briew na ki kam ba pher kum ki Doctor, Nongbishar, Nonghikai bad kiwei pat ki kynthei, ki la wan na baroh ki bynta bapher bapher jong ka sorbah ban sngap ïa kane ka jingïasaid ba sngewtynnad bad ba shongñia jong ka Ñiam ka Ri India.
Bad kim shym la sngewdiaw. U Swami Vivekananda u long uba kham khraw ban ïa ka nam jong u. U long uba donnam bad ba i donbor tam na ki nongialap ñiam ba pawnam jong ki lum Himalaya. U Nongiathuhlypa jong ka ñiam ba thymmai kaba la khleh lang ïa ki jinghikai jong ki Khristan bad ka jingstad jong ki Buddhist...
Ka Madame Calve, ka Nongrwai ba pawnam tam ha ka pyrthei ka la leit ban ïakynduh ïa u Swami Vivekananda ha ka por ba ka khuslai bha, met bad mynsiem. Ka jingïakynduh jong ka bad u Swamiji ka la wallam ïa ka jingkylla ba khraw ha ka jingim jong ka. Ka la thoh kumne:-
Ka la long ka nusib babha jong nga bad nga sngewkmen ban ïakynduh ïa u briew uba la ïaid shisha bad U Blei, u briew ba donburom, u riewkhuid, u riewstad pyrkhat bad u lok bashisha. Ka jingkhring jong u ïa ka jingim mynsiem jong nga ka la long kaba jylliew haduh katta katta. U la plie ha nga ïa ka pyrthei ba thymmai, u pynïar bad pyntylli ïa ki jingmut bad jingpyrkhat ñiam jong nga. U la pynïar ïa ka jingshemphang jong ka jingshisha. Ka mynsiem jong nga kan ïai sngewnguh ïa u junom...
Nga iehnoh ïa u da ka jingshon jingmut ba jylliew ïa ki ktien bad jinglong jong u... Nga la long pat ka briew kaba ïohmynsiem bad ba kmen. Nga ainguh ïa ki jingtrei ka mon ba khlaiñ jong u. Um shym pyndonkam da kino kino ki bor jadu ne jingpynthame. Ka la long ka jingkhlaiñ jong ka jinglong, ka jingkhuid, bad ka jingskhem ka jingthmu jong u kaba la pynngeit skhem ïa ka jingshisha.
