Ka Jingai Sngewbha U Pasan
Mynta ba la thikna ba ki Pandava ki dang im, ka nongbah Hastinapura ka shong syier thot thot. "Mano ba shah thang tyrkhong ha ka ding ?" ki la ïakylli.
"Mano pat," la ong u Duryodhana, "Dei u briew jong ngi hi bad ka kynthei kiba wan bam. Ki la thiah noh namar ba ki la buaid waiñ. Nga la ïoh jingtip ba thikna ba la don kiba ïohi ïa ka. Ka blei ding ka la bam duh ïa kata ka kynthei bad san ngut ki khun hynrei ym dei ïa kita kiba ngi thmu". Ki ïa rkhie shipara.
Na ka liang u Dhritarashtra pat u la shu ïalap ïa ka Swayamwara, bad kwah ban duwai namar ka Draupadi ka dei ka jingthaw ba phylla ba kan roi kan par ha kata ka jingïapoikha poiman. Hynrei kane pat ka la pynshla ïa u Duryodhana uba khñium, "Kumno phin kwah kumta ïa u nongshun jongngi, u Yudhistira. Balei phim kren bad leh eiei na ka bynta ki khun la jong? Phim pyrkhat eiei na ka bynta ka ïing ka sem la jong." U shu peit sat ïa la u kpa uba wat la um imat, u lah ban ïohi ïa ki, u la sma ïa ka jinglong ba don ha u khun. Nangta un sa batai leh myn rkhie, "Ngam shym la mut shisha. Nga dang dep ïa kren bad u Vidura bad da shisha ngam kwah ban pynpaw ïa ka jingsngew jongnga. Ngi dei ban long kiba husiar bad u. Nga nang mut ba phin sa ïoh rah ma phi ïa ka Draupadi kaba nga da sngewtynnad eh. Hynrei haba u Vidura u la batai, ngi dei keiñ ban husiar haba ngi ïa kren eiei shaphang kito ki khynnah ha khmat jong u. Mynta pat ngi dei ban leh noh. Phi ïohi ba u Drupada mynta u la dei kthaw ïa ki bad u lok ha ka shipa jong ki Pandava. U khun jong u, u Dhrishtadyumna u ïa ryngkat hi bad ngi. U Drupada pat, um shym la klet bad shisien ka Hima jong u ka la kad arliang, bad ba la shah pyndem ha u nonghikai jong ngi u Drona. Mynta lei lei u la nang khlaiñ bad ka por kan ym slem ban ïoh shim biang kito ki hima. Phi ïohi u nonghikai jong ngi u la leh bakla da kaba pyllait im ïa u. U Drupada un nym klet ba ngi la thom ïa ka hima jong u shisien."
"Ki Pandava ruh ki la leit thom ïa ka hima jong u," ong u Duryodhana.
"Hynrei mynta pat lah kylla lut. Ki ïadei kthaw dei pyrsa pynban. Ngi keiñ ngi dei ki nongshun jong ki baroh arliang. Sa peit ho kin ym pynjem ïa ngi."
Te u Duryodhana u la shu pyrkhat bieit ba lada lah ban thong pisa ïa u Drupada ban ai bih pynïap ne ban khlad lok na ki. Ha ka jingshisha u Dhritarashtra uba long u kpa ba jemnud ki khun u shu sngap ïa kine ki jingai buit u Duryodhana bad katno eh kin trei kam. Ka jingeh ïa u Dhritarashtra ka long ba u ieid ïa la ki khun, hynrei um lah pat ban isih ïa ki khun u para. La tip shai ba u dei uba don bynta lang ha ki jingïasuh buit bad ki jingïarai ba sniew, hynrei um lah ban pyntrei kam ïa ki jingmut ba bha jong u katba ki khun ki ïa don kti lang. Da lade hi um don ka jingmut sniew, hynrei u la ïa lympat khru shi khru bad kita pat ki jingsngewthuh ba bha jong u. Kat kiba kren ïa u, u sngap ïa ki khamtam lei lei haba u Drona, u Vidura bad u Bhishma ki ïa lum ïa u ban kren shaphang ki Pandava. Ha kaba khadduh u Bhishma u la ong, "Dei ki blei hi kiba la kyrkhu kyrdoh ïa ki. Phi lah ban pynbeit ïa ki jingbakla da kaba phah ïa ki jingkyrkhu bad ki jingaisngewbha bad sa khot sngewbha keiñ ïa kata ka pyrsa kurim kata ka ïing bad kyrkhu ïa ka. Ai kin pynkut noh ïa kata ka jingpynryngkang par bad kin wan phai noh. Ai ïa u Yudhistira kaei kaba dei hok ka jong u. Nga
te nga dei pyrsa ksiew lut ïa ki. Nga tip ba phi ïarap ïa ka jingthmu ban ym pynwit ïa phi. Hynrei katta tharai phi la sngewthuh ba kam long kaba suk ban ïohi te..." Wat u Vidura ruh u kren sneng ha kajuh ka rukom. Hynrei uba kham ban ha kaba kren dei u Drona uba ong, nga tip kaei ba u Arjun u lah ban pynduh pyndam ïa ki kynja briew. Uba halor tam u leh. Nga tip bha ïa u Drupada bad ka bor ba khie rasong, wat u khun jong u, um dei u 'riewshlur ba kai. Nga la ïohi ïa u, nga tip bha ïa u. Mynta te ka kynhun ba don sha ka liang jong ki ka dei kaba ym lah ban pynpait pynpra da kaba suk. Bun kiwei ruh kin ïasnoh ïalade bad ki; wat u Krishna uba na Dwarka ruh la ïohi ba u don bad ki. U Krishna un sa long u nongkyrshan bapawkhmat eh. Phin sa ïohi bad to tip ba u Krishna u dei u jingthaw ba kynja blei. To wat kynmaw ïa ki lait ki let ba la leit, kin ïalam pynban ïaphi sha ka jingjot."
Kane ka jingai jingsneng kam da pynsngewtynnad eh ïa ki Kauvara, bad u Karna u la maham, "wat sngap ïa ki ktien Drona, wat la u la long u nonghikai jongngi. U lei lei um tip eiei ïa ki jingpynïaid ïa ka hima. U nang tang ha ki kam ïaleh thma. U Bhishma bad u Vidura kiba don bad ngi ki dei ki briew jong ki Pandava. Kaba bha tam ïa ngi ka long ban ïalam ïa ka kynhun shipai ban pyndep ïa u Drupada, bad ryngkat bad u, ïa ki Pandava ruh. Ha ki kot bakhuid jong ngi la ong ba ka bor ba stad ka long tang ma ka ka lad ban pynduh lad ïa ki jingma. Ngi dei ban leh kloi, shuwa ba u Drupada un nang ïoh bor."
Te ha kine ki jingiataiñia ba ïa pyrshah kawei ïa kawei u Dhritarashtra u la kulmar thlim, ynda la katto katne por, u sa khot ïa u Vidura bad la hukum. "Khie leit sha Panchala. Ai ka kyrwoh khublei jong nga ïa u Drupada. To khot ïa u Yudhistira bad ki para ba kin wan bad kata ka tnga jong ki namar ba ngin ïa pynbeit ïa ka lawei jong ki ba ki lah ban ïasuk bad ki parakha jong ki.
U Vidura te u la leit sha Panchala bad la rah ki jingai sngewbha ïa u Syiem bad kiba ha ïing ha sem. La pdiang burom bad la pynshong ïa u ha ka khet ki nongwan jngoh. U la ai ki jingkhublei bad ki jingai sngewbha bad la khot sngewbha ïa ki Pandava ban wan phai noh sha Hastinapura. Katba u dang sngap u Yudhistira u peit artad sha la ki para kiba ap ïa ka rai jong u. Ki jingpyrkhat ba bun jait ha u Yudhistira ki ai jingartatien. Kumno ki lah ban shaniah biang ïa la u Pasan ha Hastinapura uba ka jingtlot jong u dei ka jingieit palat ïa ki khun runar jong u. U pyrkhat ba imat ki la pyndonkam ïa u Vidura u bym tip eiei ban khroh ïa ki sha ka jingriam. Wat la katta ruh la ong, "Phi
ïohi mynta te ngi ïa don ha ka jinglehsbun u kthaw jong ngi. Ngim lah ban leit khlem da ai jingbit ma u Drupada u la pynphai ktien kylla, "Are, kumno nga lah ban ong ba phi dei ban leit ne ban ym leit. Phim dei tang ki briew shisngi hynrei ki pyrsa burom jong nga. Ngi te, ngi sngew ba ka dei ka jong phi ruh u dawa ïa phi." U Vidura pat u la bteng biang u ong, "U hynmen jong nga u Dhritarashtra u la dei ban wan da lade keiñ hangne, hynrei phi la tip ïa ka jinglong ka bor ka met jong u. U shu shaniah ha ka mon babha jong phi ba u lah ban pdiang bad ïohi ïa phi ban kyrkhu ïa ka tnga jong phi baroh." Kane ka la nang pynbaïong shuh shuh ïa u Yudhistira uba mynta u la kut lad ba naei un ïoh ïa ka jingai buit. Tang u blei uba ïohi ïa kaba la dep mynta, bad ban wan ban ai buit ai lad ha kane ka shyngkhan khait. Ha kata ka por, u Krishna u don lang ha ka ïing Syiem. Ute u la tip ba ka nusip ki Pandava kan sa hap ha "Nga sngew ba phi dei ban leit sha Hastinapura, ki kti jong u. Ynda ki la wad buit pat na u, u ong, bad nga ruh ngan leit lang bad phi."
Ynda ki la poi ha Hastinapura, u Pasan jong ki, u Dhritarashtra u la pdiang burom ha ka rukom kaba ishongkun ïa la ki khun u para. Ynda la bun sngi hadien kata, u la ong ha u Yudhistira, "Ngan sa pynïabynta ïa kane ka Hima. Ka bynta jong phi kan long ka Khandavaprashtha. Nga kwah ïa phi ba phin leit sah bad la ki para, kumjuh ka kmie jong phi bad ka tnga jong phi shata. Ki parakha jong phi kin synshar khadar hangne, bad phin ïa im suk ha la ki Hima."
Ki Pandava ki la ïa mih nangta sha ka Ri thymmai bad la ïalam da u Krishna. Ynda poi pat ki shem ba ka dei tang ka ri shyiap. La jar katta ruh ba la kumno kumno ki la ïoh ïa ka Ri la jong ban sah. Ki sa thew sa sieh pud la ka Hima, bad hadien ki la kñia pynkhuid bad sa tei ïa ki kut, ki jaka sah shipai bad da ka jingïarap u Krishna ki nong Dwarka (ba kim shaniah shuh ïa ki nongtei ka Hastinapura). La tei ïa ka nongbah ba itynnad kaba don lut ki jingitynnad haduh ki dieng ki siej, ki surok, ki ïing paki dulan, ki dukan bah ba la die ki jingdie bym ju ïoh koit shawei pat. Bun bah ki nongshong shnong bad nongkhaïi na Hastinapura ki la wan ïatuid ban sah hangta ha nongbah ba itynnad. Ïa ka kyrteng la pynkylla noh sha ka Indraprashtha, namar ka ïadei eh bad ka jingiphieng itynnad ka nongbah ki blei.
